Լրահոս / Հայտարարություններ
ՀՀ ԱԳՆ դիվանագիտական դպրոցի ունկնդիրների ուսումնական այցն Արցախ
18.05.2018
Մայիսի 12-ից 16-ը տեղի ունեցավ ՀՀ ԱԳՆ դիվանագիտական դպրոցի ունկնդիրների ամենամյա ուսումնական այցն Արցախ, որի ընթացքում ունկնդիրները հնարավորություն ունեցան տեղում ծանոթանալ Արցախյան իրականությանը։
Այցի առաջին օրը՝ մայիսի 12-ին Դիվանագիտական դպրոցի տնօրեն, դեսպան Վահե Գաբրիելյանի ղեկավարությամբ ԴԴ ունկնդիրներն այցելեցին Արաքսի հովիտ, Կովսական և Իշխանաձոր համայնքներ, և ծանոթացան այնտեղ իրականացվող խոշոր գյուղատնտեսական և զարգացման ծրագրերին։
Հաջորդ օրը ունկնդիրները այցելեցին ՊԲ զորամասներից մեկը, զրուցեցին զինվորների և սպաների հետ, տեղեկություններ ստացան զինվորական վարժանքի և տեխնիկայի մասին։
Մայիսի 15-ին Դիվանագիտական դպրոցի ունկնդիրները հնարավորություն ունեցան հանդիպելու Արցախի հանրապետության ղեկավար կազմի հետ։ Արցախի Հանրապետության արտաքին գործերի նախարար Մասիս Մայիլյանը ունկնդիրներին ներկայացրեց արտաքին քաղաքականության հիմնական ուղղությունները և արտաքին գործերի նախարարության առջև այս փուլում դրված հիմնական խնդիրները:
ԼՂՀ Ազգային ժողովի նախագահ Աշոտ Ղուլյանի հետ հանդիպմանը ունկնդիրները ծանոթացան Արցախի օրենսդիր մարմնի կողմից իրականացվող միջազգային համագործակցության ծրագրերին, ինչպես նաև երկրի ձեռքբերումներն օրենսդրական, քաղաքական և դիվանագիտական համատեքստում։
Նույն օրը Պետական նախարար Արայիկ Հարությունյանը ունկնդիրներին ծանոթացրեց Արցախի սոցիալ-տնտեսական զարգացման առանձնահատկություններին` ընդգծելով Արցախի տնտեսության առջև դրված առաջնահերթությունները, ինչպես նաև Արցախի տնտեսության առձանագրած հաջողությունները։
Դպրոցի ունկնդիրներին ընդունեց նաև Արցախի Հանրապետության նախագահ Բակո Սահակյանը: Նախագահը գոհունակությամբ նշեց, որ Դիվանագիտական դպրոցի ունկնդիրների` Արցախ այցելելու` Դպրոցի տնօրենի նախաձեռնությունը դարձել է ավանդույթ, հատկապես կարևորելով ապագա դիվանագետների կողմից տեղում իրավիճակին ծանոթանալու հնարավորությունը։ Նախագահ Սահակյանն անդրադարձավ Հանրապետության ներքին և արտաքին քաղաքականության մի շարք առանցքային խնդիրների և պատասխանեց ունկնդիրների հարցերին:
ԴԴ ունկնդիրները Ստեփանակերտում այցելեցին ԼՂՀ զոհված ազատամարտիկների հարազատների միություն-թանգարան, ԼՂՀ անհայտ կորած ազատամարտիկների հարազատների միություն-թանգարան և Արցախի պետական պատմաերկրագիտական թանգարան, ինչպես նաև «Ղարաբաղ Կարպետ» ձեռնարկություն, իսկ Շուշիում` Կերպարվեստի, գորգի, Շուշիի պատմության, հայկական դրամի և երկրաբանության թանգարաններ և Ստեփանակերտի «ԹՈՒՄՈ» ստեղծարար տեխնոլոգիաների կենտրոն:
Հայաստանի դիվանագիտական դպրոցի ունկնդիրներն այցելեցին նաև Դադիվանքի, Գանձասարի և Ամարասի վանական համալիրներ, Շուշիի Սուրբ Ամենափրկիչ Ղազանչեցոց եկեղեցի, Հունոտի կիրճ, Տիգրանակերտի թանգարան և ծանոթացան մ.թ.ա. առաջին դարում հայոց արքա Տիգրան Մեծի հիմնադրած Տիգրանակերտ քաղաքի` 2008թ.-ից իրականացվող պեղումների արդյունքներին: