Լրահոս / Հայտարարություններ
«Հայաստան. ստեղծենք միասին» առաջին երիտասարդական հավաքի անդրանիկ նիստը ՀՀ ԱԳՆ դիվանագիտական դպրոցում
11.07.2016
2016 թ. հուլիսի 11-ին ՀՀ ԱԳՆ դիվանագիտական դպրոցում տեղի ունեցավ ՀՀ սփյուռքի նախարարության նախաձեռնությամբ և Հայկական բարեգործական ընդհանուր միության, «Լույս» և «Այբ» հիմնադրամների հետ համագործակցությամբ կազմակերպված «Հայաստան. ստեղծենք միասին» երիտասարդական հավաքի` «Հայկական շահերի պաշտպանություն և մեդիա» աշխատանքային խմբի առաջին նիստը, որի թեման էր` «Ղարաբաղյան հիմնահարցն ապրիլյան քառօրյա պատերազմից առաջ և հետո»: Նիստը վարում էր Դիվանագիտական դպրոցի տնօրեն, դեսպան Վահե Գաբրիլեյանը: Նիստի բանախոսներն էին ՀՀ ԱԺ պատգամավոր Թևան Պողոսյանը, ՀՀ Նախագահի օգնական Վարուժան Ներսիսյանը, քաղաքագետ, տարածաշրջանային անվտանգության հարցերով փորձագետ, Ռազմավարական ուսումնասիրությունների կենտրոնի փորձագետ Հրանտ Մելիք-Շահնազարյանը և ԼՂՀ արտաքին գործերի նախարարի տեղակալ Արմինե Ալեքսանյանը:
Թևան Պողոսյանը խոսեց խորհրդարանական դիվանագիտության առանձնահատկությունների մասին` ներկայացնելով հայկական շահերի պաշտպանությունը Ղարաբաղյան հիմնահարցի համատեքստում, շեշտեց բանակցային պաշարի ստեղծման և այն կառույցների գործունեության մեխանիզմների լավ իմացության անհրաժեշտությունը, որտեղ որ ծավալվում է անհատի աշխատանքային գործունեությունը: Վարուժան Ներսիսյանը ներկայացրեց Լեռնային Ղարաբաղի հակամարտության ծագման և զարգացման պատմական` այդ թվում և ներկայիս փուլերը իրավան և քաղաքական տեսանկյուններից և հակամարտության լուծման հնարավոր հեռանկարները: Հրանտ Մելիք-Շահնազարյանը քննարկեց Լեռնայի Ղարաբաղի հակամարտությունը տարածաշրջանային անվտանգության համատեքստում, իսկ Արմինե Ալեքսանյանը ներկայացրեց Լեռնային Ղարաբաղի Հանրապետության դիրքորոշումները, անդրադարձավ տարբեր տերմինաբանական ձևակերպումների արցախյան տարբերակներին` ընդգծելով դրանց օգտագործման իրավական կամ իմաստային նպատակահարմարությունը, ներկայացրեց Արցախի ժողովրդի անցած ուղին ժողովրդավարության կառուցման ուղղությամբ և Արցախում արդեն գոյություն ունեցող ժողովրդավարության ամուր հիմքերը, որը կարող է օրինակելի լինել տարածաշրջանի պետությունների համար:
Վահե Գաբրիելյանն ամփոփեց նիստի քննարկումնների արդյունքները, որին հետևեց ակտիվ հարցուպատասխան և քննարկում:
«Հայաստան. ստեղծենք միասին» երիտասարդական հավաքի ամփոփիչ` «Հայկական շահերի պաշտպանությունն արվեստի միջոցով» նիստին, որն անցկացվեց Կոմիտասի թանգարան-ինստիտուտում, ՀՀ ԱԳՆ Դիվանագիտական դպրոցի տնօրեն Վահե Գաբրիելյանը հանդես եկավ «Հայկական ժառանգությունը ՅՈՒՆԵՍԿՕ-ում» զեկույցով: